Երեկոն մեկնարկվեց Կոմիտասի անվան պետական լարային քառյակի համերգով։ Էդուարդ Թադևոսյան (առաջին ջութակ), Սյուզի Երիցյան (երկրորդ ջութակ), Ալեքսանդր Կոսեմյան(ալտ), Անժելա Սարգսյան(թավջութակ)։
Հնչեցին «Շողե՛ր ջան», «Ալ այլուխս», «Հաբրբան», «Հո՜յ նազան», «Շուշիկի» և այլ կատարումները։

«Նարեկացի» արվեստի միության հիմնադիր Նարեկ Հարությունյանը Կոմիտասի անվան պետական լարային քառյակին նվիրեց ավանդույթ դարձած նուռն ու խաչքարը, որոնց վրա փորագրված է կենտրոնի լոգոն։

-«Նարեկացի» արվեստի միությունն ունի յուրահատուկ նվեր, յուրահատուկ կոչում։ Մենք մեր ստեղծած տիտղոսը՝ որպես պարգևատրում, շնորհում ենք Կոմիտասի անվան լարային քառյակին։ Մեր կարմիր նուռն է և խաչքարը՝ «Նարեկացիի» նշանով, իսկ իմաստը հավատքն է և մշակույթը։

Համերգից հետո շնորհավորանքի խոսքերով մասնակիցներին, հյուրերին և «Նարեկացի» արվեստի միությանը ողջունեց Արցախի Հանրապետության մշակույթի նախկին նախարար Սերգեյ Շախվերդյանը։

Մինչ ցուցասրահ հյուրերին ուղեկցելը, կենտրոնի հիմնադիր Նարեկ Հարությունյանն իր շնորհակալությունը հայտնեց մասնակիցներին և կազմակերպիչներին.

- «Նարեկացի» արվեստի միությունը երախտապարտ է մշակույթի նախարարությանը, «Հայաստանի զարգացման նախաձեռնություններ» բարեգործական հիմնադրամին և բոլոր այն անհատներին, ովքեր միացան, օժանդակեցին, և սիրով աջակիցը դարձան սիմպոզիումի իրականացման գործում։

«ԲրուտԱրտ» կավագործության սիմպոզիումը կազմակերպվեց «Նարեկացի» արվեստի միության Շուշիի մասնաճյուղի կողմից, որին աջակցեց ԱՀ մշակույթի, երիտասարդության հարցերի և զբոսաշրջության նախարարությունը և «Հայաստանի զարգացման նախաձեռնություններ» բարեգործական հիմնադրամը։