ԷԴՈՒԱՐԴ ԹԱԴԵՎՈՍՅԱՆ Գեղարվեստական ղեկավար

1-ին ջութակ - Էդուարդ Թադևոսյան, ՀՀ ժողովրդական արտիստ, պետական մրցանակի և  միջազգային մրցույթների դափնեկիր, պրոֆեսոր

«Ի դեմս միջազգային մրցույթների դափնեկիր, պրոֆեսոր Էդուարդ Թադևոսյանի, «Ժողովրդական» պատվավոր կոչումը ընկալվում է նաև որպես ժողովրդայնություն, նվիրում, հոգեհարազատություն ակունքներին: Հիրավի, ջութակահարի նվագը աչքի է ընկնում ժողովրդական արվեստին հատուկ տարերային հզորությամբ, անմիջականությամբ, իմպրովիզացիոն ազատությամբ: Նաև հռոմեացի պոետ Տիբուլլոսի գովերգած և Սարյանի պատկերած «Բուրումնավետ Հայաստանի» բույրով ու գունագեղությամբ: Ով գեթ մեկ անգամ լսել է ջութակահարին, նույնիսկ ձայնագրությամբ, կարող է նման պայծառացում ապրել: Լինի դա Արամ Խաչատրյանի մեծակերտ Կոնցերտը կամ Կոմիտասի երգերի հիման վրա` Սարգիս Ասլամազյանի ստեղծած կվարտետային մանրանվագները: Պատահական չէ, որ Կոմիտասի անվան քառյակի հիմնադիր Ավետ Գաբրիելյանը հենց Թադևոսյանին է ավանդել իր երախայրիքի ղեկավարությունը...»
«Տեղին է մեջբերել Գարեգին Նժդեհի հետևյալ ասույթը. «Հայկական լավագոյնի- բարձր մարդկություն արտահայտող Գողթան երգերի բովանդակած վեհ գաղափարների-վերարծարծումն, նրանց պրոպագանդը հայ մտավորականութեան կողմից ո՛չ միայն հայկական, հայրենասիրական, այլև համամարդկային պարտականութիւն է» (Գարեգին Նժդեհ, Ասոյթներ, Ե., 2002, էջ 74): Սա է նաև Կոմիտասի անվան քառյակի և նրա ղեկավար Էդուարդ Թադևոսյանի հավատամքն ու առաքելությունը...»

ԴԱՆԻԵԼ ԵՐԱԺԻՇՏ
«ԱԶԳ» ՕՐԱԹԵՐԹ - ՄՇԱԿՈՒՅԹ, 2010

Քառյակի մյուս անդամները

  • 2-րդ ջութակ - Սյուզի Երիցյան, միջազգային մրցույթների դափնեկիր
  • Ալտ - Ալեքսանդր Կոսեմյան,
    ՀՀ վաստակավոր արտիստ, պրոֆեսոր
  • Թավջութակ - Հասմիկ Վարդանյան, միջազգային մրցույթների դափնեկիր, ՀՀ նախագահի երիտասարդական մրցանակի դափնեկիր

Կատարողական վարպետության բարձր մակարդակ

«Մտովի հայացք ձգելով քառյակի կյանքին, «թերթելով» բազմամյա ու ոգեշունչ ստեղծագործության տարեգրքի էջերը հանոզվում ես, որ նրա ստեղծած երաժշտական կերպարները հիշողությանդ մեջ մնացել են անշեջ, թովչությամբ առլեցուն, անկախ այն բանից՝ հնչել է ռուսական, արևմտաեվրոպական թե հայկական երաժշտություն: Աղեղով, ասես վրձնով, նրանք ստեղծել են տարաբնույթ ու հուզիչ երաժշտական լայնածավալ կտավներ, որմնանկարներ ու մանրանկարներ՝ ունկնդրին հնարավորություն ընձեռելով հասու լինելու և ընկալելու ժամանակակից կյանքի իմաստը, զարկերակն ու ընթացքը, հպվելու անցած դարերի մեղեդիների թրթռուն ու կենդանի շնչին...»
«Այժմ՝ Կոմիտասի անվան քառյակի հոբելյանի օրերին, ակամա խորհում ես՝ ո՞րն է նրանց մշտական հաջողության, նրանց հմայքի գաղտնիքը: Ինչու՞ է այդ տարեթիվը վերածվել երկրի երաժշտական կյանքի նշանակալի իրադարձության, ինչու՞ է ձեռք բերել այդպիսի մեծ ու լուսավոր հնչեղություն: Այն պատճառով, որ գաղտնիքը ոչ միայն նրանց բացառիկ բարձր վարպետության, այլ նրանց ողջ գործունեության ուղղվածության մեջ է: Երբեք չձգտելով արտաքին փայլի կամ հեշտ հաջողության, քառյակի կատարողները ձգտել են արտահայտելու ներքին ճշմարտությունը՝ ամեն ելույթի մեջ ներդնելով իրենց սրտի ջերմությունը, իրենց ամբողջ տաղանդը, իրենց հոգու ու բարոյականության ուժը:»

ԱՆԱՀԻՏ ՑԻՑԻԿՅԱՆ
ԵՐԵՎԱՆ, 1974

«Այդ հիանալի կոլեկտիվի ամեն մի նոր ելույթ, հիրավի, ունկնդիրներին պատճառում է անկեղծ բավականություն: Դեռ վերջերս քառյակի երիտասարդ կատարողների մասին խոսելիս մենք մտովի դառնում էինք հներին՝ անկրկնելի Ավետ Գաբրիելյանի գլխավորությամբ, և ակամա հարց էինք տալիս. իսկ ջահելները բարձրացել են, արդյոք, իրենց վարպետ նախորդների «պատվանդանին»: Այսօր մենք կարող ենք լիաբերան հաստատել, որ քառյակի՝ իրենց ուսուցիչների բարձր ավանդույթներով դաստիարակված երիտասարդ կատարողները, պահպանում են նոր խթանների հաջորդայնությունը: Եվ, ինչ խոսք, այժմ մենք ունենք արդեն ոչ թե պարզապես երիտասարդ կոլեկտիվ, այլ հասուն երաժիշտների ինքնուրույն համագործակցություն՝ իրենց անհատական ձայնով կատարողական անկրկնելի առանձնահատկություններով, գեղարվեստական հստակ դիրքորոշմամբ: Ունենք մի կոլեկտիվ, որը գեղարվեստական բարձր մակարդակով ներկայացնում է համաշխարհային և ազգային դասական երաժշտության հարստությունը և, որ առանձնապես կարևոր է, նպաստում է ազգային քառյակային գրականության ինտենսիվ զարգացմանը:»

ՄԱՐԳԱՐԻՏ ՏԵՐ-ՍԻՄՈՆՅԱՆ
ԵՐԵՎԱՆ, 1986

ՊԱՏԿԵՐԱՍՐԱՀ